រដ្ឋធានីតៃប៉ិ ៖ រដ្ឋាភិបាលប៉េកាំង តែងតែអះអាងអំពីដែនអធិបតេយ្យរបស់ខ្លួន នៅលើដែនកោះតៃវ៉ាន់ ហើយប្រទេសចិនតែងតែបញ្ជូនយន្ដហោះចម្បាំង ហោះរំលងដែនសមុទ្រ នៃកោះនោះ ទើបកងទ័ពរបស់រដ្ឋាភិបាលតៃប៉ិ ចេញយន្ដហោះចម្បាំងរបស់ខ្លួនដេញស្ទាក់ជាញឹកញាប់ រហូតចំណាយថវិកាអស់រាប់រយលានដុល្លារអាមេរិក។
បើតាមសារព័ត៌មានសិង្ហបុរី CAN បានផ្សាយ កាលពីល្ងាច ថ្ងៃទី៧ ខែតុលា ឆ្នាំ២០២០ ថា រដ្ឋមន្ត្រីការពារជាតិកោះតៃវ៉ាន់ បានអះអាងថា នៅឆ្នាំ២០២០នេះ កោះតៃវ៉ាន់បានចំណាយថវិកា ជិត៩០០លានដុល្លារសម្រាប់កងទ័ពអាកាស ចេញប្រតិបត្ដិការ រួមមានទាំងការបញ្ជូនយន្ដហោះចម្បាំងទៅដេញស្ទាក់ និងបណ្ដេញយន្ដហោះចម្បាំងរបស់ប្រទេសចិន ចេញពីដែនអាកាសរបស់ខ្លួន។
រហូតមកដល់ពេលនេះ រដ្ឋាភិបាលទីក្រុងប៉េកាំង បានចាត់ទុកកោះតៃវ៉ាន់ជាអាណាខេត្តរបស់ខ្លួន ហើយចិនតែងតែគំរាមកំហែង វាយប្រហារ និងកម្ទេចដែនកោះនេះ ប្រសិនបើរដ្ឋាភិបាលទីក្រុងតៃប៉ិ ប្រកាសឯករាជ្យ ផ្ដាច់ចេញពីចិន។ ជាមួយនឹងការគំរាមកំហែងនេះ ចិនបានបង្កើនសកម្មភាពយោធា នៅក្បែរដែនកោះនេះ ជាញឹកញាប់។
ដោយសារតែរងការគំរាមកំហែងពីចិនបែបនេះ ទើបរដ្ឋាភិបាលរបស់លោកស្រី សៃ អ៊ីវ៉ិន បានបង្កើនការចំណាយទិញគ្រឿងសឹក រហូតដល់ទៅ៦០ពាន់លានដុល្លារអាមេរិក ដោយរួមទាំងយន្ដហោះចម្បាំងទំនើបៗផងដែរ។
លោកស្រី សៃ អ៊ីវ៉ិន ប្រធានាធិបតីកោះតៃវ៉ាន់ បានអះអាងថា ទោះជាក្នុងមធ្យោបាយណាមួយក៏ដោយ លោកស្រីដាច់ខាត ត្រូវតែការពារដែនកោះមួយនេះ មិនឲ្យធ្លាក់ទៅក្នុងកណ្ដាប់ដៃរបស់ចិនប៉េកាំង នោះឡើយ។
រដ្ឋមន្ត្រីការពារជាតិតៃវ៉ាន់ លោក យិន ដេហ្វា (Yen De-fa) បានអះអាង នៅចំពោះមុខរដ្ឋសភាតៃវ៉ាន់ថា នៅក្នុងឆ្នាំ២០២០នេះ កងទ័ពអាកាសតៃវ៉ាន់ បានធ្វើប្រតិបត្តិការហោះស្ទាក់ និងបណ្ដេញយន្ដហោះចម្បាំងចិន ចំនួន ២ ៩៧២លើក។
នៅក្នុងបេសកកម្មរបស់កងទ័ពអាកាសតៃវ៉ាន់ខាងលើនេះ បានចំណាយថវិកាជាង ៨៨៦លានដុល្លារ។ ទោះជាយ៉ាងនេះក្ដី លោក Yen បានចាត់ទុកថា ស្ថានការណ៍បច្ចុប្បន្ននេះ កោះតៃវ៉ាន់កំពុងប្រឈមមុខជាមួយនឹងចិន ហើយនេះក៏ជាឱកាសដ៏អស្ចារ្យ សម្រាប់កងទ័ពតៃវ៉ាន់ត្រូវតែពង្រឹងសមត្ថភាពរបស់ខ្លួន សម្រាប់ត្រៀមធ្វើសង្គ្រាមជាមួយចិនផងដែរ។
ក្នុងរយ:ពេលប៉ុន្មានឆ្នាំចុងក្រោយនេះ កោះតៃវ៉ាន់បាននិងកំពុងពង្រឹងសមត្ថភាពកងទ័ពអាកាសរបស់ខ្លួន តាមរយៈការទិញយន្ដហោះចម្បាំងជាច្រើនគ្រឿងពីសហរដ្ឋអាមេរិក។ កាលពីឆ្នាំ២០១៩ សហរដ្ឋអាមេរិកបានអនុម័តពីការលក់យន្ដហោះចម្បាំង F-16 មានតម្លៃជាង៨ពាន់លានដុល្លារមកឱ្យកោះតៃវ៉ាន់ ហើយកិច្ចព្រមព្រៀងទិញលក់អាវុធនេះ អាច
នឹងនាំឱ្យតៃវ៉ាន់មានយន្ដហោះចម្បាំងច្រើនជាង ២០០គ្រឿង ដែលជាកងយន្ដហោះចម្បាំង F-16 ធំជាងគេបំផុតនៅអាស៊ី។ ប៉ុន្ដែកាលពីពេលកន្លងទៅថ្មីៗនេះ តៃវ៉ាន់ ក៏បានចំណាយថវិកា រហូតដល់៦០ពាន់លានដុល្លារអាមេរិក សម្រាប់ទិញយន្ដហោះចម្បាំង និងគ្រឿងសឹកដ៏ទំនើបៗបន្ថែមទៀត។ សកម្មភាពរបស់កោះតៃវ៉ាន់នាពេលនេះ គឺកំពុងតែត្រៀមលក្ខណៈសម្រាប់ការធ្វើសង្រ្គាមជាមួយនឹងចិន ដែលនឹងអាចកើតឡើង នៅក្នុងថ្ងៃណាមួយ នាពេលខាងមុខ។
