បាត់ដំបង ៖ នៅសៀលថ្ងៃទី៣០ ខែ វិច្ឆិកា ឆ្នាំ២០២១ នេះ សាខាកាកបាទក្រហមកម្ពុជា ខេត្តបាត់ដំបង បានរៀបចំ ពិធីប្រកាសសេចក្តីសម្រេចស្តីពីការទទួលស្គាល់និងកែសម្រួលតួនាទីភារកិច្ចសមាសភាពគណៈកម្មាធិការសាខាកាកបាទក្រហមកម្ពុជា ខេត្តបាត់ដំបង ដែលមានឯកឧត្តម សុខ លូ ជាប្រធានគណៈកម្មាធិការសាខា នៅក្នុងអាណត្តិទី៥។ កិច្ចប្រជុំប្រព្រឹត្តទៅ តាមប្រព័ន្ធវីដេអូហ្ស៊ូម ក្រោមអធិបតីភាពដ៏ខ្ពង់ខ្ពស់ លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា លោកជំទាវ និងឯកឧត្តម លោកជំទាវ អគ្គលេខាធិការង កក្រក ទាំង២ គណៈកម្មាធិការសាខា អនុសាខា ក្រុងស្រុក មន្ទីរអង្គភាព មន្ត្រីទីស្នាក់ការកណ្តាល ក្រុមប្រតិបត្តិសាខា តំណាងយុវជនកាកបាទក្រហម សរុបមានចំនួន ១២៧នាក់។
ជាកិច្ចចាប់ផ្តើមសាខា មានមតិស្វាគមន៍ របាយការណ៍សកម្មភាព និងរបាយការណ៍ហិរញ្ញវត្ថុ ក្នុងរយៈពេល១០ខែ ក្នុងឆ្នាំ២០២១ ជាកិច្ចបន្តលោកជំទាវ អគ្គលេខាធិការរងទី១ បានអានសេចក្តីសម្រេច ស្តីពីការទទួលស្គាល់ និងកែសម្រួលតួនាទី ភារកិច្ច ឯកឧត្តម សុខ លូ ជាប្រធានគណៈកម្មាធិការសាខា និងឯកឧត្តមបណ្ឌិត ប៊ុត គឹមស៊ាន ជាអនុប្រធានអចិន្រ្តៃយ៍គណៈកម្មាធិការសាខាកាកបាទក្រហមកម្ពុជា ខេត្តបាត់ដំបងអាណត្តិទី៥ ។
ឆ្លើយតបនឹងការផ្តល់ទំនុកចិត្តរបស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ឯកឧត្តម សុខ លូ ប្រធានគណៈកម្មាធិការសាខាថ្មី បានប្ដេជ្ញាចិត្តប្រកាន់ខ្ជាប់នូវគោលការណ៍គ្រឹះទាំង៧ នៃចលនាអន្តរជាតិកាកបាទក្រហម និងអឌ្ឍចន្ទក្រហម ដើម្បីបំពេញភារកិច្ចមនុស្សធម៌ និង រក្សាសាមគ្គីភាពក្នុងជួរគណៈកម្មាធិការសាខា ដឹកនាំតម្រង់ទិស ក្រុមប្រតិបត្តិសាខាឱ្យអនុវត្តបានល្អនូវតួនាទី ភារកិច្ច ស្របតាមយុទ្ធសាស្រ្តកាកបាទក្រហមកម្ពុជា និងទទួលយកការប្រឹក្សាជាមួយគណៈកិត្តិយសសាខា រួមគ្នាដោះស្រាយបញ្ហាប្រឈមដោយស្មារតីទទួលខុសត្រូវខ្ពស់។
ពិសេស បង្កើនគំនិតក្នុងការកៀរគររកមូលនិធិ ពីគ្រប់មជ្ឈដ្ឋាន ក្នុងបុព្វហេតុមនុស្សធម៌ ប្រមូលកម្លាំងដើម្បីរួមចំណែកកាត់បន្ថយទុក្ខលំបាករបស់ជនរងគ្រោះ និងជនងាយរងគ្រោះ។
អញ្ជើញមានប្រសាសន៍នាឱកាសនេះ លោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា បានពាំនាំប្រសាសន៍ផ្តាំផ្ញើសួរសុខទុក្ខពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជាជូនដល់អង្គពិធីទាំងមូល និងបានកោតសរសើរចំពោះគណៈកម្មាធិការសាខាសកម្មមនុស្សធម៌របស់សាខាកាកបាទក្រហមកម្ពុជា បាត់ដំបង ដែលតែងតែបានឆ្លើយតបដល់ប្រជាពលរដ្ឋរងគ្រោះ និងងាយរងគ្រោះបានទាន់ពេលវេលា។
លោកជំទាវ មានប្រសាសន៍ណែនាំតម្រង់ទិសបន្ថែមសុំអោយគណៈកម្មាធិការសាខាកាកបាទក្រហមកម្ពុជា ខេត្តបាត់ដំបង ដែលមាន ឯកឧត្តម សុខ លូ ជាប្រធាន ត្រូវខិតខំប្រឹងប្រែងជួយសាខា ពង្រឹងភាពជាម្ចាស់លើគ្រប់វិស័យការងារ និងបន្តសហការល្អជាមួយអាជ្ញាធរគ្រប់ថ្នាក់ មន្ទីរស្ថាប័ន អង្គភាព អង្គការជាតិ អន្តរជាតិ ក្នុងបុព្វហេតុ មនុស្សធម៌ គិតគូរដល់ប្រជាពលរដ្ឋរងគ្រោះ និងងាយរងគ្រោះ ឱ្យបានល្អ និងកាន់តែប្រសើរជាងមុន ក្នុងការបន្តដឹកនាំសាខា កាកបាទក្រហមកម្ពុជាខេត្តបាត់ដំបង ក្នុងអាណត្តិទី៥។ព្រមជាមួយគ្នានេះដែលសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានផ្តល់ប័ណ្ណសសើរជូនឯកឧត្តមឧកញ៉ាបណ្ឌិត ប៊ុត គឹមស៊ាន អតីតប្រធានគណៈកម្មាធិការសាខា ដែលមានស្នាដៃល្អប្រសើរក្នុងការអភិបាលដឹកនាំគ្រប់គ្រងនិងអភិវឌ្ឍសាខា-អនុសាខាក្នុងតួនាទីជាប្រធានគណៈកម្មាធិការសាខាកាកបាទក្រហមកម្ពុជាខេត្ត បាត់ដំបងចាប់តាំងពីឆ្នាំ២០០៥រហូតដល់ខែតុលាឆ្នាំ២០២១សម្រេចបាននូវលទ្ធផលរូបវន្ត័-អរូបវ័ន្តជាច្រើនគួរឲ្យកត់សម្គាល់កន្លងមក។
