ប្រទេសម៉ាឡេស៊ី​ នឹងពង្រីកកិច្ចសហប្រតិបត្តិការលើវិស័យការពារជាតិជាមួយឥណ្ឌូណេស៊ី និងហ្វីលីពីន

អន្ដរជាតិ​៖​ យោងតា​មការ​ចុះផ្សាយ​ព័ត៌មាន​ពីបរទេស​ រដ្ឋមន្ត្រីការពារជាតិម៉ាឡេស៊ី លោក Datuk Seri​Hishammuddin Hussein បាននិយាយថា ប្រទេសម៉ាឡេស៊ីបានព្រមព្រៀងពង្រឹងកិច្ចសហប្រតិបត្តិការការពារជាតិត្រីភាគីជាមួយប្រទេសឥណ្ឌូណេស៊ី និងហ្វីលីពីន តាមរយៈការរៀបចំកិច្ចសហប្រតិបត្តិការត្រីភាគី (TCA)។

កិច្ចសហប្រតិបត្តិការនេះមានសារៈសំខាន់ណាស់ និងបានបង្ហាញពីការប្តេជ្ញាចិត្តរបស់ប្រទេសទាំងបីក្នុងការធានាបាននូវស្ថានភាពសន្តិសុខនៅក្នុងសមុទ្រស៊ូលូ និងសមុទ្រស៊ូឡាវេស៊ី។

លោកបាននិយាយដូចនេះនៅក្នុងសន្និសីទសារព័ត៌មានមួយបន្ទាប់ពីកិច្ចប្រជុំនៅឯសន្និសីទសេវាកម្មការពារជាតិអាស៊ី (DSA) និងសន្តិសុខជាតិអាស៊ី (NATSEC) ឆ្នាំ២០២២ ដែលបានធ្វើឡើងនៅមជ្ឈមណ្ឌលពាណិជ្ជកម្ម និងពិព័រណ៍អន្តរជាតិម៉ាឡេស៊ី ទីក្រុងគូឡាឡាំពួ កាលពីថ្ងៃទី២៩ ខែមីនា។

លោក Hussein បាននិយាយថា រដ្ឋមន្ត្រីការពារជាតិឥណ្ឌូណេស៊ី លោក Prabowo Subianto និងរដ្ឋមន្ត្រីការពារជាតិហ្វីលីពីន លោក Delfin N Lorenzana បានសម្តែងការពេញចិត្តចំពោះស្ថានភាពនៃសកម្មភាពកិច្ចសហប្រតិបត្តិការត្រីភាគី ដែលរួមមានការល្បាតដែនសមុទ្រ និងផ្លូវអាកាស និងការផ្លាស់ប្តូរព័ត៌មានគ្នា ក៏ដូចជាស្ថានភាពប្រតិបត្តិការនៃមជ្ឈមណ្ឌលបញ្ជាការដែនសមុទ្រ ( MCCs) នៅទីក្រុង Tawau ខេត្តកោះ Tawi-Tawi និងទីក្រុងកោះ Tarakan។

លោកបាននិយាយថា ពួកគេក៏បានផ្លាស់ប្តូរទស្សនៈគ្នាស្តីពីស្ថានភាពសន្តិសុខនៅសមុទ្រស៊ូលូ និងសមុទ្រស៊ូឡាវេស៊ី និងបានទទួលស្គាល់ពីតម្រូវការក្នុងការបង្កើនកិច្ចសហប្រតិបត្តិការដើម្បីកាត់បន្ថយការគំរាមកំហែងជាបន្តបន្ទាប់នៅក្នុងតំបន់សមុទ្រផងដែរ៕