កំពង់ធំ ៖ លោក ងួន រតនៈ អភិបាលខេត្តកំពង់ធំ បានថ្លែងថា ថ្ងៃនេះមន្ទីរបរិស្ថានខេត្តកំពង់ធំបានប្រារព្ធទិវាបរិស្ថានជាតិ និងបរិស្ថានពិភពលោក ០៥ មិថុនា ក្រោម ប្រធានបទ “ថែទាំពិភពលោក ដើម្បីសុខភាពយើង” ក្នុងគោលបំណងលើកកំម្ពស់ការយល់ដឹងជាសាធារណៈអំពីការគ្រប់គ្រង និងការប្រើប្រាស់ធនធានធម្មជាតិប្រកបដោយនិរន្តរភាព ការប្រយុទ្ធប្រឆាំង និងការបប្រួលអាកាសធាតុ។
ការថ្លែងនេះនាឱកាសលោកអភិបាលខេត្ត លោកតុប កក្កដា ប្រធានមន្ទីរបរិស្ថាន លោកសាយ គឹមឡម អភិបាលស្រុកស្ទោង មន្ត្រីរាជការ ប្រជាពលរដ្ឋ និងសិស្សានុសិស្ស ជាង ៥០០នាក់ ចូលរួមកម្មវិធី ទិវាបរិស្ថានជាតិ និងបរិស្ថានពិភពលោក ០៥ មិថុនា ក្រោមប្រធានបទ “ថែទាំពិភពលោក ដើម្បីសុខភាពយើង” នៅបរិវេណវត្តហប ភូមិប៊ុលអួន ឃុំទ្រា ស្រុកស្ទោង ខេត្តកំពង់ធំ នាព្រឹកថ្ងៃទី២៣ ខែមិថុនា ឆ្នាំ២០២២។
លោកងួន រតនៈ អភិបាលខេត្តកំពង់ធំបានបន្តថា ការគ្រប់គ្រងគុណភាពបរិស្ថាន សំដៅការលើកកម្ពស់សុខភាពសាធារណៈ កិច្ចគាំពារបរិស្ថាន ការអភិរក្សជីវចម្រុះ ការគ្រប់គ្រងធនធានធម្មជាតិប្រកបដោយនិរន្តរភាព និងការបំផុសចលនាប្រជាពលរដ្ឋ ព្រះសង្ឃ កងកម្លាំងប្រដាប់អាវុធ មន្ត្រីរាជការគ្រប់លំដាប់ថ្នាក់ សិស្ស និស្សិត គ្រឹស្ថានសិក្សា វិស័យឯកជន សង្គមស៊ីវីល ដៃគូអភិវឌ្ឍន៍ជាតិ និងអន្តរជាតិ ឱ្យចូលរួមទាំងស្មារតី និងសម្ភារៈក្នុងការផ្សារភ្ជាប់ទំនាក់ទំនងជាមួយធម្មជាតិ និងកែលម្អគុណភាព សោភ័ណ្ឌភាពទីក្រុង ទីប្រជុំជន ជនបទ ភូមិឋាន វត្តអារាម សាលារៀន មន្ទីរពេទ្យ រោងចក្រ សហគ្រាស ទីផ្សារ និងមជ្ឈមណ្ឌលសេដ្ឋកិច្ច ។
លោកអភិបាលខេត្តបានបន្តថា ការពារបរិស្ថានបាន មានតែនាំគ្នាថែរក្សាបរិស្ថានទាំងអស់គ្នា និងគោរពតាមសកម្មភាព ជំរុញការដាំដើមឈើកន្លែងណាដែលទឹកហូរច្រោះ យើងត្រូវដាំដើមឈើជារបងជារនាំង យើងអាចទុកជាទំនប់ទឹក ដែលហូរពីទីខ្ពស់ មកលើទីទួលទំនាប ប៉ុន្តែបើទឹកហូរលឿនពេកហើយវាប្រមូលកាកសំណល់ផ្សេង ជាពិសេសជីវចម្រុះតែម្តង។
លោកអភិបាលខេត្តបានបញ្ជាក់ថា ត្រូវទុកដាក់សំរាម មិនបានល្អអោយឆ្ងាយពីមនុស្ស ហើយទុកដាក់អោយបានត្រឹមត្រូវ ។ សុខភាពទន្លេ បើវាហូរកាកសំណល់ អាក្រក់មក បឹងទន្លេសាប វាមិនអាចថែសុខភាពវាទេ វាខូចសុខភាពត្រីរស់នៅអត់កើត ចឹងពីរនៅលើក្មួយ ក៏ជាប្រជាពលរដ្ឋ ត្រូវថែរក្សាបរិស្ថាន ។
ទន្ទឹមនោះដែរលោកតុប កក្កដា ប្រធានមន្ទីរបរិស្ថានបានអោយដឹងថា យោងតាមលទ្ធផលនៃការសិក្សាស្រាវជ្រាវវិទ្យាសាស្ត្រជាច្រើនឆ្នាំកន្លងមក អំពីសុខភាពភពផែនដី បានដកស្រង់ត្រួសៗ ពីផលវិបាកសំខាន់ៗនៃភាពទ្រុឌទ្រោម នៃភពផែនដី ដែលជារួមមាន ការប្រែប្រួលអាកាសធាតុ (ទឹកជំនន់, ភាពរាំងស្ងួត ការកើនឡើងនូវកំដៅ ខ្យល់ព្យុះ) ការបំផ្លាញស្រទាប់អូហ្សូន (O3) ដែលការពារជីវិតមនុស្សជាតិពីកាំរស្មីអ៊ុលត្រាវីយូឡេ ដែលធ្វើឱ្យមានការរលាកស្បែក និងជំងឺមហារីកជា ដើម ការបំពុលគុណភាពទឹក ដី និងខ្យល់ ការបាត់បង់ជីវៈចម្រុះ និងជម្រកសត្វព្រៃ ។ល។ ដែលប្រជាជាតិ ទាំងអស់លើសកលលោកកំពុងពិតគួរដោះស្រាយ។
លោកប្រធានមន្ទីរបានបន្តថា យើងដឹងថា ពីភពផែនដីកំពុងស្ថិតនៅក្រោមការគំរាមកំហែង ទាមទារឱ្យមានការ ដោះស្រាយជាបន្ទាន់។ អ្វីដែលយើងអាចធ្វើបានដើម្បីចូលរួមចំណែកក្នុងការថែទាំ និងសង្គ្រោះភពផែន ដី ការបង្ហោះសារអប់រំ រូបភាព វីដេអូខ្លីៗ ដែលពាក់ព័ន្ធនឹងសកម្មភាពគាំពារបរិស្ថាន ការអភិរក្ស ធនធានធម្មជាតិ (មេត្រីភាពបរិស្ថាន និងការថែទាំភពផែនដី តាមរយៈបណ្តាញផ្សព្វផ្សាយព័ត៌មានសា ធារណៈ ដូចជា ហ្វេសប៊ុក តេឡេក្រាម TikTok វិទ្យុ ទូរទស្សន៍។ល។ ជម្រើសនេះនឹងជួយឱ្យមានការ ផ្លាស់ប្តូរផ្នត់គំនិត ទម្លាប់ និងការអនុវត្តរបស់ប្រជាពលរដ្ឋឆ្ពោះទៅរកការការពារ ថែរក្សា និងធ្វើឱ្យ ប្រសើរឡើងនូវ បរិស្ថានភពផែនដីយើង៕
