កំពង់ធំ៖ ព្រឹកថ្ងៃទី០៥ ខែកក្កដា ឆ្នាំ២០២២ លោក យក់ ឆយ សមាជិកក្រុមប្រឹក្សាស្រុកកំពង់ស្វាយ ក្រុមការងារគណបក្សប្រជាជនកម្ពុជាចុះមូលដ្ឋានព្រៃគុយ លោកជឿន សុខុន មេឃុំព្រៃគុយ ជាប្រធានគណបក្សប្រជាជនកម្ពុជាឃុំព្រៃគុយ និងសហការី ព្រមទាំងលោកមេភូមិ សំណេះសំណាល សួរសុខទុក្ខ និងថ្លែងអំណរគុណជាទីបំផុតដល់បងប្អូនប្រជាពលរដ្ឋស្ថិតនៅឃុំព្រៃគុយ ស្រុកកំពង់ស្វាយ ខេត្តកំពង់ធំ បានបោះឆ្នោតជូនគណបក្សប្រជាជនកម្ពុជា ជ្រើសរើសក្រុមប្រឹក្សាឃុំសង្កាត់អាណត្តិទី៥ ដើម្បីដឹកនាំនៅក្នុងឃុំព្រៃគុយបន្តទៀត។
លោក ជឿន សុខុន ប្រធានគណបក្សប្រជាជនកម្ពុជាឃុំព្រៃគុយ បានជួបសំណេះសំណាលសួរសុខទុក្ខក្រុមយុវជន និងបងប្អូនប្រជាពលរដ្ឋដើម្បីឱ្យធ្វើការងារវាយតម្លៃយ៉ាងល្អិតល្អន់ អំពីលទ្ធផលការងារដែលបានអនុវត្តរយៈពេល ៥ឆ្នាំកន្លងមកនេះ។ ក្នុងនោះផងដែរលោកក៍បានបន្តទៀត សូមថ្លែងអំអរគុណជូនចំពោះបងប្អូនដែលមានទឹកចិត្ត និងគាំទ្របោះឆ្នោតជូនគណបក្សប្រជាជនកម្ពុជានៅក្នុងឃុំព្រៃគុយនេះ។ ក្នុងការជ្រើសរើសក្រុមប្រឹក្សាឃុំសង្កាត់ និងរៀបចំផែនការអភិវឌ្ឍនៅក្នុងភូមិឃុំឲ្យមានការរីកចម្រើនក្នុងមូលដ្ឋានរបស់បងប្អូន។
ប្រសាសាន៍សំណេះសំណាលរបស់ លោក យក់ ឆយ សមាជិកក្រុមប្រឹក្សាស្រុកកំពង់ស្វាយ ក្រុមការងារគណបក្សប្រជាជនកម្ពុជាចុះមូលដ្ឋានព្រៃគុយមានប្រសាសន៍ថា បន្ទាប់ពីការកសាងពង្រឹងគណបក្ស ជាការកំណត់ទទួលបានជោគជ័យរបស់គណបក្សប្រជាជនកម្ពុជា ដោយមានការចូលរួមពីបងប្អូនប្រជាពលរដ្ឋនៅក្នុងឃុំទាំងមូល។ អាស្រ័យហេតុនេះហើយ កត្តាទទួលបានជោគជ័យ គឺដោយសារការចូលរួមចំណែកយ៉ាងសកម្ម និងការប្ដេជ្ញាចិត្តរបស់បងប្អូនដែលមានទំនុកចិត្តទៅលើថ្នាក់ដឹកនាំនៅក្នុងមូលដ្ឋាន។
ទន្ទឹមនឹងនេះលោក យក់ ឆយ ក៏បានយកចិត្តទុកដាក់ត្រូវពង្រឹងក្បាលម៉ាស៊ីនដឹកនាំរបស់គណបក្សប្រជាជនកម្ពុជាតាំងពីគណៈកម្មធិការសាខាបក្សភូមិ ដល់ក្រុមបក្ស ដើម្បីឱ្យមានរចនាសម្ព័ន្ធគ្រប់គ្រាន់ក្នុងការដឹកនាំ ក្នុងនោះក៏ត្រូវ ពង្រឹងរបៀបរបបធ្វើការងារឱ្យបានទៀងទាត់ម៉ត់ចត់។ ជំរុញបន្ថែមដល់មេឃុំដែលបានជាប់ឆ្នោត ក្នុងនោះបានសន្យាជាមួយបងប្អូនប្រជាពលរដ្ឋត្រូវតែអនុវត្ត និងកសាងហេដ្ឋារចនាសម្ព័ន្ធឱ្យមានការរីកចម្រើនជឿនលឿនបន្ថែមទៀត។
គួរបញ្ជាក់ផងដែរថា ប្រជាពលរដ្ឋដែលអញ្ជើញមកចូលរួម ពិធីសំណេះសំណាលនិងថ្លែងអំណរគុណ បានហូបនំបញ្ចុកសាមគ្គី ព្រមទាំងមានពិធីរាំលេងកំសាន្តជួបជុំគ្នាយ៉ាងសប្បាយរីករាយផងដែរ៕ ដោយ ធូ កែវមុន្នី
